വരുന്ന ഓണത്തിന് ചരിത്രം സൃഷ്ടിക്കാൻ കുടുംബശ്രീ ഒരുങ്ങിക്കഴിഞ്ഞു. സംസ്ഥാനത്തുടനീളമുള്ള കുടുംബശ്രീ യൂണിറ്റുകൾ ചേർന്ന് വലിയൊരു ഓണം വിപണിക്ക് രൂപം നൽകാനാണ് ലക്ഷ്യമിടുന്നത്. ഓണസദ്യയ്ക്ക് ആവശ്യമായ പുതിയതും വിഷരഹിതവുമായ പച്ചക്കറികൾ മുതൽ ചിപ്സും ശർക്കര വരട്ടിയും ഉൾപ്പെടെയുള്ള വിഭവങ്ങളെല്ലാം കുടുംബശ്രീയുടെ നേതൃത്വത്തിൽ വിപണിയിലെത്തിക്കും. ഓണത്തിനുള്ള പൂക്കളം ഒരുക്കാൻ ആവശ്യമായ പൂക്കളും കുടുംബശ്രീയുടെ വിവിധ യൂണിറ്റുകൾ പ്രത്യേകം കൃഷി ചെയ്ത് ലഭ്യമാക്കും. സ്വന്തമായി ജൈവരീതിയിൽ കൃഷി ചെയ്ത പച്ചക്കറികൾക്കും പൂക്കൾക്കും വിപണി കണ്ടെത്താനാകുമെന്ന പ്രതീക്ഷയിലാണ് അംഗങ്ങൾ. ഈ ഉദ്യമം വഴി ആയിരക്കണക്കിന് കുടുംബശ്രീ വനിതകൾക്ക് ഓണക്കാലത്ത് മികച്ച വരുമാനം നേടാൻ സാധിക്കും. പ്രാദേശികമായി ഉത്പാദിപ്പിക്കുന്ന വിഷരഹിത ഉത്പന്നങ്ങൾക്ക് പ്രോത്സാഹനം നൽകുന്നതിലൂടെ, കുടുംബശ്രീ ഉത്പന്നങ്ങൾക്ക് വലിയ സ്വീകാര്യത ലഭിക്കുമെന്നും ഇത് പ്രാദേശിക സമ്പദ്‌വ്യവസ്ഥയ്ക്ക് ഉണർവ് നൽകുമെന്നും പ്രതീക്ഷിക്കുന്നു. കുടുംബശ്രീയുടെ ഈ വർഷത്തെ ഓണം വിപണന മേളകൾ കൂടുതൽ വിപുലവും ആകർഷകവുമാക്കാൻ പ്രത്യേക പദ്ധതികളും തയ്യാറാക്കിയിട്ടുണ്ട്.

Tags : kudumbhashree onamfest kerela